1. للون غني ولمعة (الطريقة التقليدية)

• المكونات: حناء + ماء دافئ + عصير ليمون (لتثبيت اللون).
• للون البني استخدمى الكاكاو والقهوة ، للون الأحمر استخدمي الكركادية و البنجر و العكر الفاسي ، للون الأشقر استخدمى كركم و بابوننج
• الطريقة: اخلطي المكونات لحد ما تحصلي على قوام كريمي، سيبيها تتخمر ساعتين، حطيها على شعرك من ساعة لـ ساعتين ، واشطفيها بمية بس.

2. للترطيب العميق (للشعر الجاف)

• المكونات: حناء + زبادي (أو حليب جوز هند) + معلقة زيت أرجان أو زيت زيتون.
• الطريقة: اخلطي الحناء مع الزبادي والزيت، حطيها على شعرك ساعة واحدة بس، واغسليها. بتنعم الشعر جداً وبتمنع الجفاف.

3. لتقوية الجذور ومنع التساقط

• المكونات: حناء + مغلي ( المشاط ) بدل المية العادية.
• الطريقة: صفي المغلي وهو دافئ واخلطي بيه الحناء، ركزي في التوزيع على فروة الرأس، وسيبيها ساعتين قبل الغسيل.

4. للتنظيف وتطهير الفروة (ديتويكس)

• المكونات: حناء + خل تفاح (معلقة صغيرة) + مية دافية.
• الطريقة: بتنظف الفروة من القشرة والدهون، سيبيها وقت قليل (ساعة بالظبط) واشطفي شعرك كويس.

نصيحة سريعة:

• للغسيل: أول يوم اشطفي شعرك بمية وبلسم بس، وتاني يوم استخدمي الشامبو والزيت عشان اللون يثبت أكتر.

إزاي تخلي ريحة شعرك "تجنن" بالحناء؟

• مغلي الأعشاب: اعجني الحناء بماء مغلي فيه (خزامى/لافندر، ورد مجفف، وقرفة)  أو  ( المشاط ) بدل المية العادية.
• المسك أو مية الورد: بعد ما تغسلي شعرك، اشطفيه في الآخر بلتر مية مضاف ليه معلقة كبيرة مية ورد أو نقطتين زيت مسك أصلي.

قواعد ذهبية لنجاح أي طريقة:

• الشعر لازم يكون نظيف: ميكونش فيه زيوت أو كريمات عشان الحناء تمسك في الشعرة.
• الماء الفاتر: بلاش تستخدمي مية مغلية "بتغلي" عشان متموتش فوائد الأعشاب، خليها دافئة بس.
• تغطية الشعر: استخدمي "بونيه" بلاستيك أو استرتش عشان الحناء متنشفش على شعرك وتتكسر، ده بيسهل غسلها جداً.
• حمام الزيت: "إجباري" تاني يوم بعد الحناء تعملي حمام زيت (زيت زيتون أو لوز حلو) عشان تعوضي أي جفاف وتثبتي اللون.